Mit em Morgestraich fohts wie immer aa. D Knorzi sin scho fit und munter und wusle in dr Iisegass umme, allne go Hallo sage, no schnäll dr Fasnachtsgötti sueche, denn d Larve schnappe und zwüsche em Stamm iistoh. Bis am halb siebeni gässle die Junge zerscht mit em Stamm und denn ellei durch Basel. Denn gohts schnäll hei und no chli go schloofe.
Am Mäntignomidaag träffe sich d Knorzi in dr Steine. Die Oscarnominierte hän sich useputzt mit schigge Röckli und Schmuck und d Herre in schmucke Aazüg mit Zylinder, drzwüsche e paar Paparrazzi mit Wettstai-Käppli und Kamera.
Mir hän im Vorfäld alli Junge Garde nominiert, unser Logo uf ihri Latärne oder ihr Kostüm zmache. Das het wunderbar funktioniert und meh het (wenn me guet gluegt het) uf e paar fremde Latärne unsere Knorzi könne bewundere.
Am Mittwuch hän sich unseri Oscar-Nominierte und ihri Papparazzi wie dr Stamm in dr Iisegass troffe. Alli sin widr fit und useputzt und hän trotz schlächter Prognose dr Cortege bi wunderschönem Wätter könne gniesse. Zobe nach em Nachtässe het sich die ganz Wettstai am Barfi troffe und sin imene riise Zug and Schiffländi. Dört hän mir unsere traditionelle Gotti-Götti-Halt uf em Schiff wo d Knorzi au scho fascht traditionell irgend e Quatsch mien mache und dismol mit Wasserpistole um sich gschosse hän. Am 11i isch es denn au scho widr verbii und die Junge schliesse ihri Fasnacht mit em obligatorische Wettstaimarsch.
