Am zweite Bummelsunntig sin au d Knorzi unterwägs gsi.
Mir hän uns am Morge an dr Schiffländi troffe und sin nachere kurze Verwirrigsrundi rund um d Schiffländi uf dr Bus Richtig Allschwil. Im Bus isch es relativ äng gsi mit 27 Knorzi inklusive Drummle und divärse Erwachsene wo uns begleitet hän. Ussgstiige sin mir bim Van der Merwe wo mir dr wiiteri Mittag verbrocht hän. Bi dr Aamäldig hän mir 4er- bis 6er-Grüppli gmacht und hän uns eso für e Stund uf die verschiidene Bowling-Bahne verteilt. Nach zwei-drei Spiil hets denn grad näb dr Bowling-Bahn e Zmittagässe gäh. (Gratulation an die beschti Bowlingspiilerin Aurelia wo glaub über 140 Pünkt odr so gmacht het.)
Für d Ziit nachem Zmittag hän mir nomol verschiideni Spiili gmietet, d Knorzi hän sich an de Billiard- und Airhockey-Tisch könne ussprobiere oder nomol e Rundi Bowling spiile.
Uf die 4i am Nomidaag sin mir denn widr zrugg zur Schiffländi und hän s bummle durch d Innestadt gstartet. Als näggschte Fixpunkt hän mir im Rumpelkäller dr unteri Saal reserviert und sin mit de Knorzi dört öbbis go trinke und e Verschnuufpause go mache.
Für d Route d Freie durab, het dr Beat (mit tatkräftiger Unterstützig vom Sven) e Tonne Nastiechli mit unserem Kontakt bekläbbt wo mir zämme mit unserne Flyer verteilt hän. Eso hoffe mir uf neui Knorzi wo zu uns in d Clique würde cho.
Dr Räscht vom Obe sin mr mit de Knorzi zwüsche Barfi, Schiffländi und Rümmelinsplatz ummegässled und hän am 10ni vor em Stadtkäller dr Bummel und somit d Fasnacht 2017 mit em Wettstaimarsch verabschiidet.
Es isch e wunderbare Bummel gsi und ich sag allne Knorzi und Erwachsene wo drbii gsi sin ganz fescht Danke.
- Danke liebi Knorzi!
- Danke an s Begleiterteam, Claudia B., Rita, Karin, Claudio & Barbara und Claudia M. für d Betreuig während dr Fasnacht
- Danke an dr Vorstand wo sich s ganze Joor für d Knorzi engagiert; d Tatjana als Kassier, d Isabelle als Schriibere, dr Kevin als Materialverwalter und Latärnechef, dr Beat als Wärbe-/PR-Verantwortliche und Biisitzer, dr Michel als Mädchen-für-Alles, Biisitzer und Fotograf und d Debby als mini Vice.
- Danke an s Instruktoreteam wo sich s ganz Joor um d Ussbildig vo de Knorzi kümmeret; Kevin, Pius, Michel und Fabian bi de Tamboure und Debby, Céline und Justine bi de Pfyffer.
- Danke an Walti, Bruno Vetter und Kevin wo sich um unsere Latärnewaage kümmeret hän.