Zum Knorzi-Bummel 2025 hän mer ys scho frieh troffe und zwar am halber 10i am Bahnhof SBB. Voller Vorfreud sin mer in d S-Bahn ygstiige, wo ys nach Fränkedorf gfahre het. Dört usgstiige hän mer no e paar Minütli miesse laufe und denn isch schnäll klar worde wos aane goht. Mer sin in Swiss Megapark, wo sich d Knorzi stundelange bim klättere und uff de Trampolin hän könne ustobe. Drzwüsche hets no feyni Pizza gäh und die obligati Aasproch inkl. Verdanggige vom Obmaa. Die Erwaggsene sin in dr Zwüschezyt mit Dänggsport gfordered worde und zwar bimene Rätzelduell. Gege die 4i hän mer ys widr uff e Wääg gmacht in d Stadt, wo im DeWette-Pärkli e nägschte Programmpunggt uff ys gwartet het. Leider hän mer ys an däm Bummel vo zwei langjöörige, gschätzte Knorzi miesse verabschiide. Als Abschied hän alli e rote und blaue Balloon bekoo, passend zu unserem Sujet. Per Zuefall hän mer dört grad no d Pfluderi aatroffe und mit ihne spontan dr erscht Waggel gmacht. E paar Stündli spöter sin mer au no offiziell mit ihne verabredet gsii. Nach eme biz längere Verpflägigshalt am Barfi, hän mer welle d Freiestroos durab. Leider het ys do e grosse Stau e Strich durch d Rächnig gmacht und so hän mer ys miesse defür entscheide, d Freie uszloh, drmit mr Pünggtlig am 8i bim Stadtkäller yträffe, wo grad drei Verpflichtige uff ys gwartet hän. Mer hän nämmlig e Ständeli gspiilt für d Yvonne, wo für uns alli Goschdym gnäiht het und drnoch sin mer mit de Pfluderi für e gmainsame Waggel verabredet gsii. Ebefalls sin die jüngere Knorzi abgholt worde. Nach em Gwaggel mit de Pfluderi het ys denn au no s gued Wätter verloh und so hän mer e biz länger am Andreasplatz im Schärme usghart, in dr Hoffnig, s wird nomol biz trockener bis zum Ändstraich. S het denn tatsächlich e biz noch gloh uns so sin mer sofort losgloffe in Richtig Stadtkäller, nur hets nach e paar Meter leider scho widr voll afoh aabeschütte. D Knorzi hän sich abr nit beirre loh und sin wacker bis zum Stadtkäller gässlet, wo sy vom pausierende Stamm vo de Schnurebegge unter Applaus empfange worde sin. Do eh scho alli durchnässt gsi sin, hän d Knorzi dr Ändstraich au no im strömende Rääge durezooge. Dä Arabi wird wohrschiehnlich als ein vo de schnällschtgspiilte in d Gschicht yygoh, uff jede Fall wärde sich d Knorzi no lang an dä Ändstraich könne erinnere. Zum Schluss möcht y mi im Name vo de Knorzi bi dr Sina und dr Kira für d Organisation vo däm tolle Bummel bedangge!
Fabian
