Doo kei Clique gfunde worde isch wo s Grimpeli duet organisiere, hät dasjoor eigentlich gar keins sotte stattfinde. Zum Glück het sich abr dr Obmaa vo de junge Bebbi dezue entschlosse e Ersatz für die Junge z’organisiere, wo denn au stattgfunde het. D Knorzi sin mit zwei Teams verträtte gsi, in dr Kategorie Juniors und Jungi. D Gruppephase isch bi beidne Teams glych verloffe, s hän Beidi zweimol gwunne und zweimol verlore, was dr dritt Platz in dr Gruppe bedütet het. Dangg em bessere Goolverhältnis under de Drittplatzierte, sin beidi Teams in Viertelfinal ko. Bi de Junge isch dört allerdings Ändstation gsi. D Juniors hän sich imene umkämpfte Spiel mit 4:3 knapp könne duresetze und sin so in Halbfinal yyzoge, wo sy völlig entfessled uffgspielt und d Gegner mit eme 5:1 us em Turnier gworfe hän. Uff dr Final het denn leider s Wätter nüm welle mitspiele und so hän sich d Knorzi im strömende Rääge miesse gschlage gäh. Nach dr Flucht in Schärme und ere kurze Verdauigszyt, het me sich denn abr über dä grossartig zweit Platz könne freue. E grosse Dangg goht an alli wo das Grümpeli möglich gmacht und d Knorzi am Spielfäldrand unterstützt hän.
Fabian
