Bereits im April 2024 het e erschti Sitzig fürs Laaferi 2025 stattgfunde. Verträter:inne vo 30 Junge Garde hän sich in Saal im Leuezorn drängt, zum de Plän vom OK z’lusche. Ufgrund vo däm riesige Interässe isch schnäll festgstande, dass sich d’Clique wärde müese zämmeschliesse. So hän mir das Projäggt gmeinsam mit de Pfluderi-Clique Jungi Garde dörfe starte.
S’Kärnteam hän dr Fabian und ich mit zwei Verträterinne vo de Pfluderi bildet. Dass mr uff dr Bühni wän e Märliwald usspiele, isch ufgrund vo de Disney-Sujets im 2024 schnäll feschtgstande. Au mit dr zytlige Planig isch klar gsi, dass mr d’Atelierarbete im Summer sötte verrichte, zum uns drnoo uf s’Musikalische könne z’fokussiere. So hän mir unsere Tannewald baschlet und stundelang in dr Sandgruebe Karton usgschnitte, bemoolt und müehselig an d’Räf montiert.
E erschts Highlight hets im Auguscht gää, wo mr im Rahme vom Knorzi-Weekend am Sunntig Nomidaag uff d’Sandgruebe sin, zum die Junge Pfluderi besser kennezleere. Noch aafänglige Hemmige ischs e glungene Nomidaag worde und d’Vorzeiche für e tolls Laaferi sin guet gstande.
Im Herbscht isch die Sach denn ärnschter worde. Mir hän d’Musik finalisiert und im Oggtober mit em Spiil die erschti gmeinsami Proob abghalte. Im Novämber het denn dr erschti Probedaag stattgfunde, an däm mr nomol in Grüppli hän könne yebe, und au em Vortrab genauer hän könne zeige, was si müen mache. Es isch ene no bitz schwer gfalle, sich in ihre Rolle z’finde, und au dr Ablauf isch nonig bi allne in d’Köpf, was uns liicht ins Schwitze brocht het. So hän mr em Prozäss müesse vertraue… Aber es hän sich au alli witer könne kenneleere, unter anderem bi Schneeballschlachte und gmeinsame Ässenspäusli.
Au gege Jooresändi ischs nit ruhiger worde; mir hän d’Kostüm müesse organisiere, zuesätzligi Sache kaufe, e Schildkrottepanzer und (nomol…) e Öpfel baschtle, und ich ha eh kei Ahnig meh, wie vyyl Sitzige mir für das Laaferi abghalte hän… Mir hän aber au die finale Infos vom OK beko und uns zumindist e Yydailig könne spaare – alli Knorzi und Jungi Pfluderi wo umme gsi sin, hän an allne Laaferi-Uftritt könne dailnää.
Am 1. Hoornig hän mr dr zweiti Probedaag gha. Dur e Usloose-Spiel isch entschiide worde, was d’Vorträbler:inne für Statiste-Rolle wärde haa, und wär die begehrti Schildkrot dörf syy. Dismol hän mr au d’Kostüm mitbrocht, drmit sich alli besser in ihri Rolle könne yyne fühle. Ich persönlig bi sehr zfriide gsy, wie’s musikalisch noch dr aafänglige Morge-Müedigkeit dönt het – nämlig richtig guet! Und au dr Ablauf het langsam, aber sicher klappt.
Sin mr denn parat gsi? Me könnts meine… 6 Dääg vor dr Premiere sin mr nomol zu Viert ins Atelier gstande zum unsers Requisit, s’Huus vom Schneewittli, z’moole. Schlag uf Schlag isches gange, und denn isches au scho so wyt gsi! An dr Stellproob hän mr s’erscht Moll d’Bühni gseh und öppe 20 Moll ghört, as mr gfälligscht uf d’Belüüchtig müen ufpasse mit däm Huus und unserne Bäum. Aber mir hän uns als wie besser organisiert, vorallem hinter dr Bühni. An dere Stell e riiiese Danggschön an all unseri flyssige Hälfer:inne hinter de Kulisse!
An dr Première het me d’Nervosität gspürt und bim yyspiele isch alles no bitz chaotisch verloffe. Bsunders s’lyyslige Warte hinter dr Bühni isch an jedem Uftritt e Useforderig gsy. Schlussändlig hän mr aber au das gmeischteret, unds gschafft, e yydrüggligs Bild z’erzüüge. Mit dimmtem Liecht und Waldgrüsch isches losgange, wo sich langsam Tierli us em Määrliwald gschliche hän, und s’Schneewittli ufem Wäg zu ihrem Huus no s’Publikum begrüesst het. Doch d’Häx het se verschrogge und d’Tierli hän sich wider im Wald und hinter em Huus müesse verstegge. Zum Glügg sin d’Zwärge füre ko, wo wiederum d’Häx abgschreggt hän, und d’Tierli hän sich wider füre getraut. Glychzytig het s’Spiil «Heigh-Ho» usem Schneewittli-Film aagstumme, zum das Ganze musikalisch z’untermoole. D’Zwärge sin ab dr Bühni, und d’Musigg isch in «Hänsel und Gretel» übergange, wo durch Mickey und Minnie und Donald und Daisy verkörperet worde sin. Zum Schluss isch denn aber nüm s’Schneewittli im Huus gsi, sondern d’Häx het usem Fänster gluegt, kurz bevor alles dunkel worde isch… und d’Halle in tosendem Applaus usbroche isch.
Am Ändi vo jedere Vorstellig isch denn no s’Highlight aagstande: alli Junge zämme hän dr Morgestraich pfyffe und drummlet, und sin us allne Richtige in d’Halle yyne gloffe. Maagisch!
Am Samstig hän mr zwei Uftritt gha, wo mit eme kleine Ässe überbruggt worde sin. Mir hän Wienerli plant, was es unglüggligerwyys au am Laaferi scho ständig gää het. Trotzdäm hets allne guet doo, e bitz us dr Halle use z’ko. Au sunscht hän mr d’Pause immer kreativ gnutzt, mit Krällele, Spieli, Schutte, oder au mol e bitz Erholig und Verpfläägig. S’Laaferi isch lut, wild, und chaotisch – aber au üsserscht farbig, kreativ und wunderschön, und mir wärde unseri erschti Dailnaam sicher no lang in gueter Erinnerig bhalte.
Megan
