Am Sunntignomidaag am 4i hets bim Wettsteischuelhuus ghaisse «Yystoh!» Ändlich widr emol! Und eso isch e kleins Grüppli Knorzi begleitet vo ihrne Instruktore, e chli Unterstützig vom Stamm und eme kleine Fan-Club mit Eltere und Fotografe uf e Gässli-Rundi ins Kleibasel gstartet.
Dä JuGaA (Junge Garden Anlass) isch vo Junge Garde in Zämmearbet mit dr Noochwuggsförderig vom Comité entstande und het de Junge Garde nach zweimolig abgsaiter Fasnacht widr emol (oder überhaupt emol) s Gässle in dr Stadt ermöglicht. Mir hän also für zwei Stund dörfe in dr Stadt pfyffe, drummle und durch d Stroose gässle. Dr Aalass isch im Vorfäld gheim ghalte worde. Es isch nid s Ziil gsi e grossi Menschemängi in d Stadt z logge, sondern eifach, dass die Junge widr mol e bitzli Fasnachtsgfühl hän.
Mir sin also mit unserem Grüppli bim Wettsteischuelhuus gstartet, vom Claraplatz über d Rhygass an Rhy abe und sin bi schönstem Sunneschiin em Rhy entlang bis zu dr Mittlere Brugg gässlet. So wie d Lüüt am Rhy und in de Stroose gluegt und gstrahlt hän, hän au si Freud ka, ghört me widr emol Fasnachtsmusik in dr Stadt.
Nachere kurze Verschnuufspause sin mir miteme zweite Waggel über die Mittleri Brugg und via Fischmärt zum Rümmelinsplatz uffe. Wie an dr Fasnacht hets do immer am meischte Lüüt. Vyli Zueschauer am Strooserand und vyli anderi Clique wo mr krüzt hän oder wo mir dra vrbiigloffe sin. E ganz e tolli Stimmig isch das gsi. Fascht wie Fasnacht.
D Zyt isch schnäll vrbii gange und mir hän uns scho widr miesse ufe Ruggwäg mache. E kurzi Strecki d Freie Stroos durab, widr zrugg über dr Rhy und an Claraplatz zum Wettsteischuelhuus. Für die meischte Knorzi isch es s erschte Mol gsi mit pfyffe und gliichziitig laufe oder drummle und gliichziitig laufe und luege, dass d Drummle bliibt wo si söll. Es isch also sicher herussfordernd gsi für die Kleine. Aber sie häns alli super gmacht und hän toll pfyffe und drummlet.
Mir hän e ganz e tolle Sunntig kah. Danke allne Knorzi, wo im Vordraab oder spiilend drbii gsi sind, ihr händ super ussgseh. Und danke au vylmol allne Instruktore und Unterstützer für eur musikalische Iisatz und allne Fotografe und Familie, wo uns begleitet hän.
