Nach eme wunderschöne Moorgestraich hän sich zem Cortège 40 Chemieaffe und Versuechs-Joggelis, aagfiehrt vom Oberaff Dave Dääge, am Bankverein droffe. D Knorzi hän s Sujet “Chemieaffe sueche d FCB-Erfolgsformle” usgspiilt. Im Vortrab sin drum d Versuechs-Joggeli gloffe, wo erkenne loh hän, as scho dr Äind odr Ander Versuech uff em Wääg zum Erfolg in d Hose gangen isch. Uff em Requisit isch e gschyterte Versuech vo Chemieaffe abgfiehrt worde. D Ladärne het sich stark mit dr Erfolgsformelfindig im Labor beschäftigt und drhinter isch au scho dr Chef vom Zug koh, dr Dambourmajor als Oberaff Dave Dääge. Är het sini Chemieaffe voll im Griff ka, wo flissig drummled und pfyffe und drbyy d Erfolgsformle nie us em Blick loh hän. Das het sich, wie mr hütte wüsse, absolut glohnt und dangg unserer Arbet hän mr grad zwei Titel dörfe fyyre. Nach em Cortège am Mäntig hän d Knorzi amene neue Ort Znacht gässe und zwar im Käller vo de Ohregribler, y ha mr loh sage s häig super gschmeggt. Am Zyschtig sin d Knorzi wie allewyyl frei gsi und die wo hän mööge, sin zoobe am Elfi mit dr ganze Glygge yygstande und hän so dr zweit Fasnachtsdaag abgschlosse. Am Mittwuch het sich die ganz Wettstai in dr Yysegass droffe wo zerscht no dr obligati Fotitermin aagstanden isch. Drnoch sin d Knorzi die inner Route gloffe, wo sy am Oobe scho widr amene neue Ort gässe hän, dismol im Vito am Äscheplatz. Au vo dört han y nur gueds ghört. Nach em Nachtässe het sich die ganz Clique am Barfi troffe, wos denn no e paar gmeinsami Waggel gäh het, bis zem Ändstraich vo de Knorzi. So isch die Fasnacht au scho widr zÄnd gange, wo de Fotis noch wohl e volle Erfolg gsi isch, s sin ämmel nur glücklichi Gsichter druff zerkenne gsi.
Fabian
