Sunntig vor dr Fasnacht
Am Sunntigzoobe dräffe mir uns zur Ladärnevernissage im Waisenhaus und stimme uns mit Geträngg und enere super guete Mählsubbe uf die drey scheenschte Dääg y.
Morgestraich
Ändlig ischs sowyt. Am halber Vieri besammle mir uns in dr Ysegass, ass mr au parat sinn, wenn am Vieri in ganz Basel s’Liecht abgoht und’s Martinsglöggli d Fasnacht yylütet.
Bis am siebeni sinn mir zämme in de Gasse vo Basel unterwägs und verabschiede uns vor em Restaurant Stadtkeller.
Cortège am Mändig
Scho am Nomidaag dräffe mir uns wieder und laufe vom Banggeplatz in Richtig Glaibasel los. Nach em viile drummle und pfyffe bruuche mir e Pause und gniesse zämme e guets Nachtässe.
Drmit unseri Ladärne am Zyschtig kaa bestunnt wärde, stelle mir sie uf e Minschterblatz. Am zähni z’Nacht isch vor em Restaurant Stadtkäller Schluss fir hitte.
Zyschtig
Dr Fasnachtszyschtig isch fir unseri Knorzi frey. z’Ooobe dräffe sich alli Zyschtigsgrüppli vo dr Wettstai-Clique und ziehn gmainsam dur d Gasse.
Cortège am Mittwuch
Drmit mir dr letscht Fasnachtsdaag in volle Ziig kenne gniesse, dräffe mir uns in dr Ysegass und marschiere zämme mit em Stamm in’s Glaibasel. Nach däm lange Nomidaag stergge mir uns wieder mit emene guete z’Nacht.
Die letschte Stunde vo dr Fasnacht verbringe mir zämme mit em Stamm und dr alte Garde. Am elfi z’Nacht dien mir vor em Restaurant Stadtkeller d Fasnacht verabschiede.
Wotsch gseh wie bi uns Fasnacht in Bilder uusgseht, denn gang uf Fasnachtsbyyträäg
