Im kleine Rahme mit allne Knorzi und de Eltere hän mir widr e Intärns Vorpfyffe und -drummle kah.
Mir hän uns am Samschtig Obe am 5i im Räbhuss troffe. Im Saal obe isch scho alles schön dekoriert gsi mit Larve, Fasnachtsbändeli und Fasnachtslatärnli.
Nachdäm alli iitroffe sin hets e kurzi Begriessig gäh und d Idee und s Programm vo däm Obe sin vorgstellt worde.
Gstartet hän d Knorzi gmeinsam mit de Instruktore und em Vorstand mit em Arabi. Denn isch d Lelia zämme mit ihrer Instruktorin uf d Bühni cho und hets ABC-Liedli gspiilt. Au bim zweite Ufftritt isch si mit drbii gsi; die kleine Pfyffer hän zämme s Uhreliedli im Kanon vortreit.
Nach de Pfyffer hän au d Tamboure zeigt was si könne. Dr Fabian het als Tamboure-Instrukter mit sine Knorzi e Trummelschuel zeigt.
So ischs hi- und här gange. D Pfyffer sin widr dra gsi. D Binggis-Pfyffer hän zämme dr Ryslaifer pfyffe und d Tamboure hän dr Binggis drummlet.
Vor dr Pause hets e Gastufftritt gäh. Dr Sven und sini Kollegin, d Saskia, sin zämme am Offizielle e Solo-Duo-Grüppli. Und an unserem Knorzi-Obe hän si uns zeigt wie si zwei zämme töne. E super Abschluss vo dr erste Programmhälfti.
Nachere kurze Pause, isch au die zweiti Hälfti miteme Highlight gstartet. S zweite Solo-Duo-Grüppli wo am Offizielle mitmacht, d Aurelia und d Chantal, hän die zweiti Programmhälfti eröffnet.
Denn hän d Pfyffer und Tamboure usem Spiil no ihri Ufftritt kah. D Crystal und d Kira hän jewiils e Marsch pfyffe und dr Fabrizio und Aurelia au jewiils e Drummlermarsch drummlet. Es sin super Ufftritt gsi und mir sin so stolz uf alli wo füre gstande sin und e Ufftritt gmacht hän. Bravo!
Zum Schluss sin mir nomol alli zämme – Knorzi, Instruktore und Vorstand – uf d Bühni und hän als gmeinsame Abschluss dr Wettstai-Marsch gspiilt.
Nach dene Biiträg und däm tolle Programm sin mir denn abe ins Restaurant vom Räbhuus und hän no zämme Znachtgässe und dr Obe gmeinsam ussklinge loo.
Danke an alli wo an däm Obe drbii gsi sin.
