Nachdäm mir joorelang fürs Knorzi-Weekend uf Hochwald gfahre sin, hän mir disjoor e Abwächslig welle. Dorum hän mir in dr Umgäbig e anders passends Hüüsli gfunde und sin daasmol uf Ederswiler ins Lagerhuus Sunnebärg.
Mir hän uns am Samschtig-Mittag am Bahnhof troffe, hän s grosse Gepäck ins Auto paggt und d Kinder sin zämme mit de Begleiter ufe Zug. Nach 20 Minute Zugfahrt sin mir in Laufe ufs Poschtauti umgstiige und inere sehr rasante Fahrt bis uf Ederswiler uffe gfahre.
Dört acho hän sich d Knorzi uf die beide Zimmer verteilt und ihres Züüg usspackt bevor s denn e kleine Imbiss gäh het. Bi schönstem Spootsummerwätter sin mir vorusse ghoggt, hän Z’Mittag gässe und d Ussicht gnosse.
Denn ischs Musikalische losgange und d Instruktore hän mit de Kinder in verschiidene Grüppli pfyffe und drummlet. Drzwüsche hets immer widr kleini oder grösseri Pause zum Spiile oder für s Zvieri gäh. Durch dr Ortswäggsel hän mir in däm Joor zum Glück kei Kampf gege Wäspi um s Z’Vieri miesse fiere. S het nur e paar Biinli kah, aber die sin harmlos gsi.
Am Nomidaag isch no e Clique-intärni Fotografin ufem Töff verbiicho und het e paar Schnappschüss vo unserne Knorzi gmacht.
S Wätter isch dr ganz Daag so schön gsi, dass mir kuum dinne im Huus gsi sin. Au zum Z’Nachtässe hän mir könne dusse bliibe. D Kuchi het e grosse Topf Spaghetti mit Tomatesosse oder Bolognese zauberet. S hät au Salat kah, aber das het nur wenigi Kinder intressiert, drfür isch dr ganzi Topf Spaghetti am Schluss wäg gsi.
Als Obeprogramm hets wie immer d Sujetwahl gäh. Mir hän uns alli zämme im Uffenthaltsruum versammlet und hän vo allne Knorzi ihri Sujetvorschläg entgegegno und besproche. Es sin einigi Vorschläg zämme cho. Me het gmerkt, dass sich d Knorzi fescht ufe Fasnacht freue. Schliesslich hän e paar Knorzi no nie könne anere Fasnacht teilnäh. Es muess also e tolls Sujet ane! Will leider nid alli am Weekend hän könne drbi syy, hän mir au Vorschläg über dr Knorzi-WhatsApp-Chat entgegegno und sone Vorschlag het denn au gwunne. Was s Sujet vo de Knorzi wird sii, wänn mir aber do nonig verrote.
D Sujetwahl het e chli Ziit bruucht und so isch es denn nach dr Sujetwahl au scho Ziit fürs Bett gsi. Das het au e chli Ziit bruucht, aber irgendwenn isch denn in de Kinderzimmer au Rueh gsi.
Nid für lang, denn frieh am Morge sin d Knorzi au scho widr wach und uf de Bei gsi. Als ussergwöhnliche Wecker het sich ussversehe (wirklich ussversehe, s isch nüt passiert und die Beteiligte hän nüt drfür könne) dr Brandalarm gmolde. Also sin alli schnäll wach gsi und s het pünktlich am Achti Z’Morge gäh.
Am Sunntigmorge hän mir nüm allzuviil Ziit zum pfyffe und drummle kah, s het nur e relativ kurzi Iebigs-Session gäh. Nachem gmeinsame Uffruuume und Putze isch d Ziit in Ederswiler denn scho bald verbii gsi. S grosse Gepäck hän mir widr ins Auto packt und sin in Einerkolonne zur Poschtauti-Station.
Zrugg in Basel hän uns d Eltere widr empfange und somit isch s disjöhrige Weekend z’Änd gange.
Danke viilmol allne Instruktore und Hälfer wo im Weekend drbii gsi sin und Danke allne Knorzi wo mitcho sin, mit uns giebt hän und mit uns s Sujet für die näggschti Fasnacht ussgsuecht hän.