Fürs Knorzi-Weekend sin mr au das Joor uf Hölste gfahre und hän uns am 13. Septämber dr Hügel uff zum Jugendhuus Leuebärg kämpft. Nochdäm d’Zimmer bezoge worde sin und mr Zmittag gässe hän, isch es glyy scho ans Probe gange. Abgseh vo dr wohlverdiente Zvieripause, wo vo unserem wunderbare Kuchiteam vorbereitet worde isch, hän alli Knorzi e stränge Nomidaag gha und flyssig probt.
Das Joor hets e kleini Neuerig gää: Mir hän d’Wahl vom Sujet vor em Znachtässe gmacht, drmit s’Programm am Obe weniger vollpackt isch. Wider hän die ältere Knorzi, wo in de Wuchene drvor vier vo de Sujetvorschläg usgarbeitet hän, die mögliche Sujet präsentiert und Idee zur Umsetzig vorgstellt. So vyyl ka me verroote, usnahmslos alli Stimme sin an zwei vo de Vorschläg gange, während die andere beide leer usgange sin.
Noch dr Wahl hän mr e Pastaplausch zum Znacht dörfe gniesse. Mit neuer Energie ischs ans Spiele gange – nit uff Inschtrumänt, sondern als gmeinsami Aggtivität. Die Erwaggsene hän flyssig Zeedeli im ganze Huus versteggt, während d’Sina s’Spiel organisiert het. Nochdäm sich mit einiger Müeh denn Teams bildet hän, het me müese würfle, und het die Zahl uff em Leiterlispiil dörfe vorwärts go. Denn het s jewyylige Team die Zahl, wo sy grad gstande sin, in ihrer Teamfarb müesse sueche. Nit überraschend isch das Ganze relativ chaotisch gsy, aber d’Knorzi sin lang gnueg beschäftigt gsy, dass sy sich noch Spiiländi fascht scho hän müesse bettfertig mache.
Noch ere mee oder weniger ruhige Nacht hets am 8i z’Morge gää, und d’Knorzi hän vor de 9e all ihri Sache packt, bevors wider ans Proobe gange isch. Die aint oder dr ander sin doch relativ müed gsy, hän aber trotzdäm no einiges glernt, während s’Spiil traditionell gmainsam d’Märsch duregmacht het.
Noch em obligatorische Gruppefoti isch es denn au scho wider ans Uffruume gange. Das het sich das Joor e bitz aifacher gstaltet, do dr Leuebärg e Reinigungspauschale yygfiehrt het, und mir nur s’Gröbschte hän müese putze. Mir sin voll im Zytplan gsy und mit vyyl Glerntem und eme Sujet im Gepäck guet zrugg in Basel aako.
Megan
