Piccolouusbildig / Drummeluusbildig / Erwachsene-Kurs
Maitli und Buebe ab 7 Joor kenne bi uns nit nur pfyffe und drummle lehre, sie kenne au am gsamte Cliqueläbe mitmache und dr ganzi Zauber vo dr Basler Fasnacht kenneleere.
Iebigsort:
im Wettstai-Schuelhuus, Clarastroos 50, Basel
Iebigsstunde starte immer nach de Oschterferie. In de Schulferien und an Fyyrtig gits kaini Iebigsstunde.
Iebigszit:
allewyl am Donnschtig zwische sächsi und achti zoobe.
Piccolouusbildig
Do leersch du als Knorzi alles Schritt fir Schritt. Aagfange mit de erschte Griff, em Notelääse, de Taktarte und dr Doonlaitere. Sitzt das aimol, stoht de erschte Melodie nyt me im Wäg und scho bald kasch du au scho dr erscht Marsch, dr «Arabi», pfyffe.
Spöter als Binggis kemme denn no wytteri Märsch wie die «Alte Schwyzer» oder «dr Ryslaifer» drzu. Denn goohts ans uswändig leere, drmit de scho bald an der Fasnacht kasch mitpfyffe. Mit dr Zyt wird’s Repertoir als wie grösser, bis du denn an dr Fasnacht im Spiel kasch mitlaufe und dy Kenne kasch zum Beschte gäh.
Drummeluusbildig
Grundlage, Note und Taktarte sin au bi de Dambuure an oberschte Stell. Hesch du dr «Bataflafla», dr «Schlepp» und dr «Wirbel» emol im Griff, so kasch du bald scho mit em Iebe vom «Arabi» aafoo. Hesch du als Binggis die erschte vier Märsch uswändig gleert, so kasch du scho an dr Fasnacht mitdrummle. Spöter kemme denn no wytteri Streich derzu, so dass du di au an die schwierige Märsch kasch wooge. Isch s’Repertoir aimol glehrt, dörfsch du an dr Fasnacht im Spiel mitdrummle.
Erwachsene-Kurs
Mir biete au Kurs fir Erwachseni aa. Mäld di, wenn wotsch Pfyffe lehre bi dr Pfyfferchefin oder zum Drummle lehre bim Drummelchef.
