Mir Knorzi sinn im Joor 1962 als Jungi Garde vo dr Wettstai-Clique grindet worde und sinn momentan e Grubbe vo ca. 30 Kinder zwische 6 und 18 Joor. Bi uns kasch du pfyffe und drummle lehre oder aifach numme s’Cliqueläbe mit uns gniesse und an dr Fasnacht im Vortrab mitmache.
Mir leege Wärt uf e guete Kontaggt zwische uns, de Knorzi und em Stamm. Dorum gits fir d’Fasnacht e «Gotte-Götti-Syschtem», dass haisst, jedes Knorzi-Mitglied bekunnt e Götti oder e Gotte us em Stamm zudailt. Dr Götti oder d Gotte isch bi de gmainsame Pause an dr Fasnacht fir’s Woolsyy vo sym Göttikind zuständig.
Mit 16 Joor sin die Juugendlige an de Stammiebige härzlig willkomme und mit 18 träte si normalerwys in Stamm yybere.
Au Frindschaft isch uns Knorzi sehr wichtig und mir gniesse während em ganze Joor verschiedeni Aaläss wie’s Clique-Grimpeli, dr Summerstamm – wo Kinder mit ihrne Familie e gmietlige Grilloobe verbringe, dr Mässbummel, Schlittschuefahre, em Wettstai-Oobe mit dr ganze Clique, Vorfasnachtsverastaltige und unser Knorzi-Weekend. Im Weekend findet näbem Spiile und Musiziere au d Sujet-Wahl statt, wo d Kinder ihr Sujet fir die näggscht Fasnacht sälber wääle. Au bi dr Vorbereitig fir d’Fasnacht sinn unseri Knorzi aktiv involviert und hälfe im Atelier bi dr Gstaltig vom Zug mit.
