Am Samschtig 14. Novämber sind mir yglade worde e Ständeli z’bringe. D’ Sonate – Schlyffer händ ihre Jubiläums – Obe gfyyrt und mir sind die erschti Nummere gsi, händ also dä Obe eröffnet.
Nachdäm mir uns am halb siebeni zoobe vor em Volkshuus bi strömendem Räge troffe händ, sind mir in e Saal gfiehrt worde, wo mir in ängschte Platzverhältnis uns umzooge händ. Es sind alli es bizeli Nervös gsi, es isch au für einigi s’erschte mol gsi dass si uffere Bühni stöhn. I ha gwüsst dass e Samschtig-Obe nid optimal isch für so e Ufftritt, und während bi de Tamboure nur wenigi gfählt händ (bravo) hets doch bi de Pfyffer grösseri Lugge kha, schad dass nid mehr händ könne kho (vor allem vom Spiel), si händ halt anders vor kha, eso sind d’Pfyffer verstärkt worde durch Ihri Instruktore,und durch Verstärkig vom Stamm durch Priska und Nora. E riese Dank an Euch. Dr Vortrab isch zahlrich gsi…
D Tamboure händ sich ohni Verstärkig guet uff dr Bühni behauptet und eso sind die 3 Märsch, Arabi, Ryslaifer und 10.Värs super über d’Büni gange.
Kostümtechnisch sind d’Drummler alli in Uniform kho, d Pfyffer Charivari und im Vortrab hets vieli schöni Waggis kha. Dr Vortrab het denne au e spezielli Uffgoob kha, si händ de Lüt im Saal Täfeli verteilt was die denne au alli gärn gno händ.
Natürlig sind mir mit 2 Stäggelatärne und dr Standarte uff dr Bühni gsi, also gsamthaft händ mir e ganz tolle, farbige, spannende, musikalisch guete Ufftritt kha, wo uns no lang in Errinnerig blibt.
Mir Gratuliere de Sonate – Schlyffer zum 20. Jubiläum und sage Danke für d’Yladig.
Für alli Wettstai – Knorzi
Dr Obmaa Michel
