e Wettstai-Knorzi si

Hesch scho immer welle wüsse, wie sich’s afühlt, drey Daag lang dr Zauber  vo dr Fasnacht z’spüre. Het’s di scho allewyl gluschtet, en Inschtrumänt z’spiele? Denn kumm zu uns in d’Wettstai Knorzi!

Mir sin e glatte Huffe, wo dr Spass und s Zämmesy an erschter Stell stehn. Unter em  Joor dien mir fliessig iebe, ass mir an de “drey scheenschte Dääg” gmainsam durch d Basler Gasse kenne zieh: En  absolute Höhepunggt!

Wär flyssig drummelt und pfyfft, brucht natürlig au emol en Abwäggslig. En Ussflug an d’Herbschtmäss, e Grillplausch im Summer oder e gmainsams Wuchenänd, sinn wytteri spannendi Sache us unserem Cliquejoor.

Und wär no kinschtlerischi Fähigkeite hett, ka die bi uns voll usläbe. Denn nämmlig, wenn mir unser eige Sujet usschaffe. Was gits Bessers, als die sälber baschtleti Larve an dr Fasnacht dr ganze Stadt zeige z kenne?

In de Wettstai Knorzi könne Maitli und Buebe ab 7 Joor Fasnacht mache. Als Pfyffer oder Drummler und au als Vordräbler bisch Du bi uns härzligg willkomme!

Bisch Du au drbi? Super, denn mäld Di bi uns oder kumm aifach ammene Donnschtigzoobe im Wettsteischuelhuus verbii.