D’Knorzi am Clique-Grümpeli 2023
Mit zwei Mannschafte, neue Liibli und ganz viel Vorfreud sin d’Knorzi am Grümpeli aaträtte. D’Binggis sin under em Name «Wettstai-Kickers» ins Renne gange und die Junge als «Wettstai-United». Troffe hän mer ys am Samstig uff die 11i bim Wettstaizält, unserem Hauptquartier für’s Grümpeli. Dört hän mer ys vorbereitet und spötischtens noch em Uffwärme, gleitet vom Andrin, sin mer baraat gsi für’s erschte Spiil. S’erscht Spiil het gliichzytig stattgfunde, was s Aafiiehre für d Fans e biz schwieriger gmacht het. Trotz starker Leischtig vo allne Knorzi, het s Glück bi beidne Mannschafte am Schluss gfäält und so hän beidi knapp mit eim Goal differänz verlore. Jänu, ka passiere, im nägschte Spiil laufts denn besser. So isch’s denn au koo, die Junge hän s zweit Spiil mit 4:2 könne gwünne und d’Binggis hän no ein oobedruff gleggt und ihri Gegner mit eme 9:1 besiigt. Zwüscheduure no öbis zu unserne Fans, die sin nämmligg zaalriich verträtte gsii und hän über dr ganz Daag mit ganz viel Usduur e wahnsinns Stimmig gmacht und sämtlichi Wettstai-Teams zu Höggschtleischtige triibe. Wyter goots mit em dritte Spiil, in däm hän d’Binggis gege dr Tabällefiehrer imene starke Kampf e Punkt könne mitnäh, 3:3 het s’Ändresultat glutet. Die Junge hän jetzt ihre grosse Momänt ka, miteme starke 8:1 hän si ihri Gegner vom Platz gfäggt. Im vierte und letschte Spiil isch’s für beidi Mannschafte ums Wyterkoo gange. D’Binggis sin zerscht draa gsi und hän nomol alles gää für e Sieg, leider het’s aber nit klappt und so hän si knapp mit 2:3 verlore. Au bi de Junge ischs nit besser gloffe, sie hän gege starki Olymper e 2:5 Niiderlag miese hiinää. So sin beidi Mannschafte leider ganz knapp usgschiide. Trotzdäm hän mer zämme e wunderschöne Daag dörfe gniesse, wo mr nit so schnäll wärde vergässe und nägscht Joor schaffe mers denn uff jede Fall in die nägscht Rundi! 😊
Viele Dangg an alli Knorzi für eure starke Yysatz und au allne Fans e grosse Dangg für die toll Unterstützig vo dr Sytelinie!
Fabian
