Für dr Knorzi Bummel träffe sich d Knorzi mit de Begleiter, de Knorzi-Instruktore, e paar vo de gladene Jubilare vo letscht Joor (dr Hanspi, dr Peter Aemisegger und dr Peter Schenk) und em Stamm-Tambourmajor in Allschwil an dr Ändstation vom 6er. Bevors ins Restaurant zum Mittagässe goht, gässle mr durch Allschwil, möglichst durch die ängste Gässli wo mr finde. Nach em Mittagässe und de Dankes-Räpplipin stöhn mr widr ii und spiile uns zur näggste Bushaltstell. Vo dört gohts äng in Bus drängelet richtig Oberwil ins Play4you, e Spiileparadies für jung und alt in dr Ziegelei. Unseri Gruppe bekunnt e Ruum voll Spiili, drvo kei einzigs elektornisch und kah sich eso zwei Stund vergniege. So wie das ussgseh het, hän alli ihre Spass dra kah, vo de Knorzi über dr Vorstand bis zu de Gäst. Uf die 5i sin mr widr zrugg uf Basel, wo mr vo dr Familie Butz zum Aalass vo dr Saskia ihrem Geburtsdaag mit Muffins verköstigt worde sin. Gfolgt vom obligate Aastoh, bevor mr d Freiestroos hän könne durab und die letschte Stunde durch d Stroose gässlet sin. Vor em zähni zobe sin mr am Stadtkäller iigloffe und hän dr Moni Zaugg, wo ihres joorelange Amt als Instruktorin mit dere Fasnacht offiziell uffhört, d Route-Symphonie als Abschlussständeli brocht , gfolgt vom obligate Wettstaimarsch, wo dr Bummel beändet het.
