D’Knorzi am Glvffe-Grümpeli uff dr Sandgruebe
Am 25/26 Juni isch wie allewyl s Gliquegrimpeli duregfiehrt worde vo dr VKB.
Mir sind bi de Binggis – Kategorie bis 14 Johr – mit eme Team am Start gsi , gmischt mit Meitlis und Buebe vo de Knorzi’s und no Fründe vo Ihne, quasi als Verstärkig.
Head-Coach Beat Zaugg het mit em Technische Beroter Thomas Schneider das Team gleitet, dr Präsi het sich im Hintergrund ghalte und sich mit em Team gfreut…
Bi allerbeschtem Wätter sind mir am Samschtig in d Vorrundi gstartet, und mir händ uns als Gruppezweite für die nägschti Rundi qualifiziert.
Das het zur Folg kha, dass mir am Sunntig frieh am morge, genau am 10.00h händ miesse uff dr Matte stoh, aber denne isch es ändlig für unseri Fuessballe los gange.
Obwohl mir physisch unterläge gsi sind, händ unseri Kickers in de folgende 4 Spiel 3x gwunne und 1x verlore, das isch zwar e topleischtig, doch unseri Gegner sind genau so guet gsi, und so isch es kho, dass am schluss eso knapp gsi, dass es e froog vom Goal-Verhältniss gsi isch, und do sind mir 2 Goal im minus gsi. Jänu, Turnier verbi, Einheitsbrys verteilt, es bizeli truurugi Gsichter, aber mir dörfe stolz si uff die Leischtig wo si zeigt händ, es het meeega freud gmacht däne zuzluege bim schutte.
Und dorum isch es klar, mir nägscht Johr wieder derbi sind, e Johr grösser und denn luege mir, wie’s denne ussgseht….
für d Wettstai-United
Michel