S‘ Knozi Weekend het au das Joor im altehrwürdige Lagerhuus vo Hochwald stattgfunde. Dangg em luxuriöse Gepäggtransport hän d Knorzi d Reis nach Hochwald mit Zug und Bus ohni grossi Asträngige könne gniesse.
S erschte Highlight vom Weekend isch scho d Busfahrt uf Hochwald gsi. Nachdäm d Knorzi im mehr oder minder harmonisch tönende Chor, s „tüüü-däää-dooo – Poschtauto“ agstumme hän, het sich au dr Chauffeur erweiche loh und het in jedere Kurzve unter tosendem gejole und gegröle vo de Knorzi voll druflos ghornt. Nach eme kurze Spaziergang zum Lagerhuus hän d Knorzi nur kurz Zit gha um ihri Zimmer z bezieh bevors diräggt mit em Drummle und Pfyffe losgange isch. Da mir hauptsächlich für dr Clique-Obe giebt hän, isch d Motivation in allne Gruppe sehr hoch gsi. Natürlich isch au s Spiele, Fuessballspiele, Umeseggle und Ustobe nit z kurz ko.
Nit nur d Knorzi und d Instruggtore hän dr ganz Nomidaag hart gschafft, sondern au s Kuchiteam isch schweer beschäftigt gsi. So sin alli froh gsi wo s Nachtässe (Hörnli mit Ghacktem, Öpfelmuess und Salat) uf em Tisch gstande isch. So gschterggt sind d Knorzi kreativ gforderet worde und hän für e Clique-Obe könne Hintergrundbilder mole. Wie die Aktion useko isch möchte i an dere Stell nit verroote, sondern hoff Ihr wärdet die Maischterwärgg alli persönlich am Clique-Obe könne bestuune. Dr traditionelli Abschluss vom Samschtig isch wie allewiil e klassische bunte Obe gsi. Ufgrund vo de hoche Temperature het sich die ersehnti Bettrueh nur sehr, sehr schleppent igstellt.
Für gwüssi Knorzi isch, entsprächend dr spoote Nachtrueh, s Zmorge wohrschienlich e bizeli frieh uf em Tisch gstande. Trotzdäm hän sich aber alli nomol könne stärke und aschliessend bi schönschtem Wätter zämme vorusse könne für e grosse Uftritt iebe. Nodisno sin au d Knorzieltere drzue gstosse und die grossi Schlacht für e freie Paltz uf em Grill het agfange. I dängg für die meischte Knorzi und Knorzieltere wird au d Usgoob 2010 in sehr gueter Erinnerig blibe und dr Knorzivorstand het eimol meh bestätigt beko, dass mir in dr Wettstai s Glück hän, e wirklich glatte Nochwuggs dörfe z ha.
E Fan vo unsere Knorzi
