Dr erscht Dail
D Wettstai Knorzi im Fasnachts-Dschungel
Zum dritte Mol isch dr Wettstai-Oobe duuregfiehrt worde. Mr sind das Mol im katholische Kirchgmaind-Saal in Allschwil gseh. Wiederum isch es de Organisatore glunge e unterhaltsams Programm zämme z’stelle.
Ganz in der Manier vo Gottschalk/Hunziker händ dr Peter und d’Sandra d’Bsuecher vom Oobe begriesst und händ mitdailt, ass dr erschti Dail vom Oobe durch d’Knorzi bestritte wird. Uff de Tischset isch s’Pogramm uffdruggt gseh. Dr Knorzi-Ufftritt hett dr Titel „E Fasnachtsrais duur e Jungel“ drait. Die einzelne Dail vo däre Rais sind durch d’Gschicht vom glaine Nils umrahmt worde. D’Gschicht, bombastisch vom Teddy verzellt, handlet vom glaine Nils, wo s’erscht Mol bi de Knorzi an dr Fasnacht derf mitmache. Aigentlig will er aber lieber Schutte statt drummle iebe und wär lieber z’Spanie mit em FCB im Trainingslager. D’Fasnacht kunnt em e Bitz vor wie dr Dschungel. Und so isch dr Rahme gsetzt gseh. Nummere wo an dr Zeichetrickfilm vom Walt Disney „Jungelbuech“ aglehnt gseh sind, händ sich mit klassische Fasnachtsufftritt abgwäggslet. So isch s’Ganze mit em Morgestraich (dunkle Saal, Kopf- und Stäggelatärne) gstartet. Drnoh händ d’Knorzi no dr Arabi, z’Basel am mym Rhy, dr Saggodo sowie dr Ueli darbotte. Bym Ueli hett nitt nur dr Vortrag, sondern au d’Larve iberzygt. Aigentlig sinds jo kaini Larve gseh, sondern d’Tamboure händ Kinder-Strumpfhose ibere Kopf gstraift gha. D’Bai sind gstopft gseh und so hett s’Ganze ussgseh wie d’Hörner vo de Ueli. D’Jungelnummere sind gstartet mit emmene Gwitterräge. Mit Plastiksägg, sogenannte Donner-Bichse, em blosse Schnippe mit de Finger und em Klopfe uf de Schänggel hätt me richtige Gwitterräge kenne vertone (super). Wyteri Nummere vom erschte Dail sind gseh d’Elephante-Parade, em Balu si Gmietligkaits-Song, d’Hypnos vo dr Schlange Kah sowie dr Tanz vom King Louis und em Balu. Klar isch s’gseh, ass em glaini Nils nach so viele Nummere so gfalle hett, ass är nur no Fasnacht will mache und s’Schutte gar nimm es so wichtig isch.
Nach dr Pause
D Ohregribler Guggemusik vom Feinschte.
Nach em erschte Höhepunggt isch d’Ässenspause gstartet. Dr Roger (vo de Letzi) und si Kochteam händ hunderti von Schnitzel, Taigware, Sauce und Gmiess kocht. Zem Dessert isch es riesigs Kuechebuffet parat gstande. Ich ha zersch gmaint, ass wohl do d’Hälfti wieder hai goht, aber bis am Änd isch dr Kueche gässe gseh. Während em Ässe sind no Tombola-Lösli verkauft worde. Jetzt hann ich wieder e neiji Topfpflanze und e neijs Badtuech.
Drnoh isch dr zwaiti Dail gstartet. Verschiedeni Nummere händ sich abgwäggslet. Zerscht isch es ohrebetäubend losgange. D’Guggemuusig Ohregribler händ mehreri Stück gschränzt. E Bitz ruhiger isch es drnoh gseh. E gmischti Gruppe uss Knorzi, Knorzi-Instruggter und Stamm händ dr Dummbeeter uffgfiehrt. Jetzt weiss ich, wie dä Marsch au kennt deene, aber au perfäggt pyffe und drummlet, kan ich mi immer noonig drfyr erwärme. Nach em Dummbeeter isch Showtime mit em Timmy gseh. Er hätt uns e komischi Variante vom Schiller sy Wilhelm Tell uffgfiehrt. D’Elfi hätt derzue d’Verzällere gmacht. Nach dr Comedy isch dr Stamm mit em Drummelimarsch, Matroos, an dr Raihe gseh. Drnoh händ Popeye dr Piranhas gruesst. Als Gegepol zu de baide fasnächtlige Ufftritt isch jetzt d’Basler Mittwuchs Band an dr Reihe gseh, e wundervolle New Orleans Jazz-Kapälle mit hervorragende Blöser. Mr hätte no vyl me Zuegoobe kenne aloose, doch irgendwenn isch es fertig gseh. So isch es denne halt zem grosse Finale kho. Knorzi und Stamm händ, wie sichs gheert, zämme zem Schluss dr Wettstai Marsch gspielt.
Wieder hän mir e wunderbare Oobe kenne gniesse. An däre Stell e riesigs Danggerscheen an d’Hauptorganisatore Sandra und Peter, an d’Instruggtore vo de Knorzi, an alli, wo mit emene Vortrag uff dr Bihni gseh sind, sowie an die vyle, vyle Hälfer vor und hinter dr Bihni. Ich freu mi scho druff, wenn mr gmainsam dr näggschti gmainsami Oobe kenne duurefiehre.
E beschte Dangg goht au an e digge Pfyffer, äh Fotigraph, fyr die vyle Helge.
Luc
